Brienne to Queen of Poland, Compiègne, 19 May 1646

Clairambault 1067

f226r

Madame,

La lettre dont Vre Maté m’a honorée en datte du xe du passé ne me fut rendue que le jour d’hier xviiie du present. Je tiens à grace le reproche et le commandement que Vre Maté me fait. La raison de ma retenue n’a pas peu luy desplaire puis que c’est par respect. V. Maté se trouve aussy obeye par la prompte response que je fais à sa lettre mais peut estre n’ay je pas suivy son sens, qui pouvoit estre que je communicasse sa despesche à la Reyne.

f226v

Et ensuite que je luy fisse sçavoir ses intentions.

Le mien a esté qu’en la pluspart des affaires du monde le souverain conseil est de gaigner temps, et que ce seroit assez? tost respondre aux ministres de Monsieur de Mantoue quand ilz renouvelleroient leurs instances; et peut estre qu’ayant presentement diverses choses à poursuivre ilz pourront s’oublier de celle-là, et ainsi le titre du gouvernement de Nivernois se trouvera fortiffié d’une possession maintenue depuis son absence du Royaume.

f227r

Quant au droict Vre Maté me permettra de luy dire qu’il est si puissamment estably en faveur des ducz de Nivernois qu’il seroit impossible de le mettre en doubte, ainsi en la pensée de le vendre Vostre Maté trouveroit de la difficulté. Mais pour se le conserver il y a un exemple qui faict pour elle en ce que le Roy y ayant? autre fois pourveu. L’on se contenta pour reparer le tort qui estoit fait au duc de Nevers de luy promettre le regres.

f227v

À la chose, et il s’en contenta.

Les serviteurs de Vre Maté ont autant d’impatience de la parfaicte connoissance du Roy son seigneur que V. M. raisonnablement en doibt avoir. Ilz jugent par la cognoissance qu’ilz ont des grandes qualités et des graces qui sont en vous, le pouvoir que vous vous acquererés sur son esprit, quand il n’y aura rien qui le separe de V. M., dont la puissance et la grandeur est si hautement establie qu’il n’y a rien à luy desirer sinon qu’elle en jouisse longuement et heureusement à l’advantage des couronnes que Dieu luy a soubmises. Il ne se parle en nre court que de faire partir ceux qui commandent les armées. Desjà Monsieur le Duc d’Anguien s’est acheminé au rendez-vous de la sienne et Son Altesse Royale fait esperer qu’il se rendra dans le lendemain des festes à Angers pour y recevoir les commandemens de leurs Majestez qui esperent d’avancer la paix generale faisant esclatter leurs puissances dans les pays de l’ennemy, qui voit celle des Hollandois en estat d’agir et d’y entreprendre

f228r

Sur la mer nous y paroissons si puissamment armez que toute l’Italie en est allarmée et en eschec, ne sachant où doibt surgir nostre flotte, de laquelle nous attendons des nouvelles avec beaucoup d’impatience. Les dernieres sont que M. le Prince Thomas s’y est embarqué à la rade du port de Vaye et s’ilz n’ont point eu le vent contraire ilz doibvent desjà avoir pris terre et avancé l’entreprise qui leur est commandée.

J’adjouste que leurs Matez ont trouvé le sejour de cette ville si beau, qu’on parle d’y accommoder le Chasteau. Leur santé est toute telle que leurs sujetz et serviteurs la leur peuvent desirer, et sachant qu’il n’y a point de nouvelle qui puisse estre plus agréable à Vre Maté, c’est par où je donneray fin à cette lettre affin qu’en s’occupant de cette pensée cela luy face oublier toutes les autres choses que je luy ay escrittes

f228v

qui luy pourroient desplaire, l’asseurant que je seray tant que j’auray de vie

Madame,

Très humble et très obeyssant serviteur de Vre Maté,

Brienne.

À Compiègne ce xixe May1646.