L’Abbé to Nevers, 1577

Français 3198

f62r

Monseigneur.

J'ay le 22e du passé presenté les deux vostres lettres voyans que non seulement le gentilhomme mentionné à mes dernieres du 5e du passé n'estoit par chemin, mais qu'on n'esperoit qu'il fust pour sitost s'encheminer pour cause des nouveaux troubles de France, et les aurois presentées incontinent que l'homme de la Royne arriva icy retournant de Court, que fut le xij, mais ne me fut possible mettant le xe survenir une fievre qui me tint garder la chambre 19 jours. Je parlay hier au seigneur Vicechancelier pensant qu'il auroit leues lesdictes lettres, mais cestant excusé ne luy avoir esté possible pour les empeschemens grands qu'il avoit eu, le suppliai les vouloir veoir et proposer le plustost qu'il luy seroit possible, chose qu'il promist faire monstrant avoir plaisir de la substance que je luy narray contenir lesdictes lettres ; j'en solliciteray la resolution avec toutes diligences. Le 24e du passé j'escrivay au seigneur Barquin par deux voies diverses qu'on m'a promiz estre asseurées, et luy ay envoyé par l'une copie de la chiffre que je vous envoyay avec mesdictes dernieres, affin que nous nous pouvions escrire librement. Je pensois bien avoir par ledict homme de la Royne de vos lettres et aussi argent, comme m'escrivoit ainsi estre Monsieur de Vulcob par sa lettre du xixe de Janvier, mais il m'a dict ne luy avoir esté baillé ny l'un ny l'aultre, et ce pour advis.

Le Seigneur Riva partit d'icy deux ou trois jours apres mesdictes dernieres, et le jour d'hier nous que le Seigneur Prospero Gonzaga est en arrivé Ambassadeur qu'on dict seulement pour faire les complimens.

Jacoit que Monsieur le Nonce mondui eust escrit que Dansick se seroit rendue avec les conditions que par mesdictes dernieres je vous escrivis, et aussi par aultre voye il avoit esté entendu le mesme, il n'a neantmoins esté vray, mais bien est la vraye verité, et de ce ay je hier veu lettres dattées de l'unzieme de febvrier à Iuroma en Prusse, que ladicte cité tient fort et ferme, et pour mettre les habitans en division, le Batori avoit le ve dudict febvrier faict publier un Edict par lequel il declaroit que tous ceulx lesquelz dedans le temps de xx jours se partiroient avec leurs femmes, enfans et biens, il les tiendroit pour les siens et de la corone de Pologne, et que passé ledict temps seroient tenus pour Rebelles et ennemys tous ceulx qui se trouveroient dedans ladicte Ville, pour laquelle emporter il ait faict appeler pour le xve du present tous les estats de Pologne leurs commandant de comparoistre en ordre à Wratislavie cité es confins de Prussie à 35 lieues de Wratislavie en Silesie et 20 de Varsovie, pour le bien du Reaulme. Il ne tient au siege dudict Dansick l'avantage de 4 ou 5 mil hommes, desquelz Johan Sborosky est General, avec lesquelz est à environ trois lieues loing dudict Dansky, où ilz sont esté bien battus trois ou quatre fois durant qu'on traictoit desdictes conditions qu'avoient offert ceulx de dedans, mais l'orgueil du Batory et le conseil de l'evesque de Cuiauia, qui vouloient incontinent faire faire une cittadelle dedans la Ville et leur oster tous leurs privileges et franchises, ont tout renversé. Le Comte Conrad de Mansfeldt est entré dedans la Ville avec bon nombre de gens d'armes, lesquelz pourront bien tenir quelque temps, mais estans les

f62v

habitans tous marchans, ne pourront durer long temps, et la Pologne se portera aussi mal cessant le trafficque. J'entend de plusieurs que le dict Batory grandement hai de tous generallement et ainsi bien des sboroschi comme des aultres, pour son grand o[rg]ueil, ne baillant à pas un qui qu'il soit, salve ledict Evesque qui gouverne le tout, donne parolle. Il est demeuré ferme qu'il est à la Diete de Iuroma, avec environ deux cens personnes. L'Infante est à Varsovie fort mal satisfaicte dudict Batory, lequel se monstre fort catholique en effect, car ayant plusieurs annees passées le Senat de Iuroma occupé les biens d'une Eglise collegiale de sainct Lorens de la mesme Ville, aboly le service divin et ceremonies de l'eglise catholique Romaine, il [?] vient qu'il veult ouir la messe, et luy ayant esté respondu qu'il n'y avoit Eglise de catholiques pour avoir esté occupée comme dessus, feit venir à soy ledict Senat, auquel, apres avoir demandé la cause pour laquelle ilz avoient ainsi occupés les biens de ladicte Eglise et dechassés les Ecclesiastiques, fut respondu ce avoir esté faict du temps de Sigismond Roy, et à l'heure d'iceluy et du temps du Roy Estphanus, le tout sera rendu à qui il appartient, et ainsi commanda que le lendemain tous les ornemens de ladicte Eglise qui sont fort precieux fussent renduz et semblablement les revenues d'icelle, chose qui fut mise en execution, et ainsi le lendemain ledict Evesque consacra ladicte Eglise et y celebra la messe avec grand contentement des catholiques.

L'Evesque de Mondeui Nonce du Pape le 15e du passé n'estoit encores parti de Wratislavie, où estoit encores pour se partir le lendemain, attendant le retour du Comte Cristoforo Rozrazes? qu'il avoit envoyé vers l'Archevesque de Gnesna ; il avoit neantmoins commission d'aller trouver ledict Batory, comme il vous aura pleu entendre par mesdictes dernieres, et comme j'ay hier entendu du seigneur uuarsau[i]cio, il sera sollicité affin qu'il s'enchemine le plustost qu'il pourra affin qu'il se treuve à la dicte diete pour uoir de troouer mo[i]en que les affaires de dansqui s'acc[om]modassen[t], pouvant estre la ruine du reaulme et de chrestiente, car ledict Batory s'aydera et des Tartars et des Turcs et encores des Hongrois s'il aura argent, lequel luy default comme il s'entend d'un chacun. Il me vient affirmé que les Polonois ne veulent prendre les armes contre ladicte Dansky, allegans que si ledict Batory leur auroit voulu confirmer leurs privileges, il ne seroit occasion de perdre sa reputation ou de ruiner le Reaulme. Ledict uuarsauuicio est de opinion que ledict de [?]deij pourroit remedier à tout.

Il y a trois jours que sont arrivez un Ambassadeur dudict Batory avec neuf chevaulx et un homme du Beques de Transilvanie, lesquelz eurent hier devant disner audience de l'empereur l'un apres l'aultre en presence des

f63r

conseillers secrets de sa Majesté, et comme j'entend, lesdicts ne sont sinon porteurs de lettres lesquelles, comme j'entend dudict uuasauuicio, sont pour supplier à sa Majesté qu'elle soit contente que le dict Beques puisse prendre femme en hongrie, et pour aussi entendre si l'emperur baillera audict Batory titre de roi pour envoyer uers sa maieste un Ambassadeur, surquoy on tien pour certain qu'il sera contenté, ains qu'on aura aggreable qu'il soit ami de ceste maison, et combien que ne soit pour son esgard sera pour celuy du turc, avec lequel on s'esforcera, avec tous les moyens possibles, auoir paix, suyvans iceulx l'oppinion de fer[d]inand emperur, et de laquelle par toutes mes lettres avez peu entendre estre le uueber et le trautzen qui gouvernent comme ilz faisoient.

Les Polonois sont diuises comme ilz estoient, et jacoit qu'ilz monstrent bon uisage au batori, aux coeurs est le contraire pour certain, comme j'entend non seulement dudict uuarsauicio, mais aussi de plusieurs aultres.

Ledict uuarsauicio, en presence d'un serviteur de l'empereur qui est praticien des affaires de moscoui[e] et de pologne, disoit hier avoir entendu pour certain que Riga? et Revel estoient es mains du Moscovite, s'ayant l'une desdictes rendue de sa propre volonté et ayant l'aultre esté surprinse, et que ce estant, comme il le croyoit, la Russie se rendroit incontinent tant pour la Religion grecque qu'ilz tient comme pour estre le Palatin de Russie homme qui tourne à tous vents, et que par consequence la Lituanie se porteroit mal.

La plus grand parte des Polonois tient que ledict Batory ne soit pour vivre long temps, pour autant chacun s'ayde le mieux qu'il peult. Et jusque à maintenant le seigneur Warsawicio ha eu de l'empereur une pention de cinq cens talars par an soit resident ou le veult, pourveu qu'il ne face contre ceste maison, mais comme de luy mesme j'ay entendu, il ait esperance qu'il sera remis à sa Patrie, surquoy attend il icy resolution de Pologne, laquelle venue, il se partiroit d'icy incontinent pour les grandes despenses qu'il y faict. Le Sborosky partit d'icy avec cinq cens talars pour son voyage et espoir, nil d'assignation en Silesie au seigneur Lasky. Lasky n'a esté encores rien baillé de certain, mais ce pendant on luy baille quelque somme d'argent toutes les sepmaines pour se pouvoir entretenir, lequel faict la court aux florentins, et ledict Warsawicio

f63v

aux sauoiens, en cas de nouuelle election. Le referendaire n'alla en Pologne, ains il s'attend icy de jour à aultre, et y est semblablement le Palatin Calisiense tant pour estre aydé comme pour r'avoir ce qu'il fut levé à son frere sur la Jurisdiction de l'Abbaye de Fulde retournant de France.

Il me vient dict que le Comte Hierome Lasroslof? soit allé vers ledict Batory au lieu de venir à Wratislavie.

Combien qu'on ay dict jusque à present que l'empereur passeroit d'icy en Lusatie, Silesie et Moravie, il m'a neantmoins ce matin esté dict qu'il iroit premierement à Vienne et en Hongrie, mais on ne scet encores s'il se partira incontinent apres les obseques de son pere, qui seront le xxe du present, ou incontinent apres les Pasques, mais est il certain que la Majesté de l'Emperatrix et la Royne Blanche demeurent icy.

L'Empereur n'ait demandé aux estats de ce Reaulme sinon deux cens mil talars chacun an pour deux ans, pour l'ayde des confins de Hongrie, et que les imposts ordinairs soient prolongés pour deux aultres ans, et si ce qui est à payer pour le temps passé. Il ait davantage exhorté lesdicts estats à considerer où et comment on feroit la Riviere appellée Albis navigable par tout le Reaulme. Item comment on pourroit lever l'abus des Vestemens et Banquets qu'on faict superflues en ce Reaulme. Sur lesquels articles lesdicts estats doivent ce jourd'huy bailler derniere resolution à sa Majesté Imperiale, et beaucoup plus brief qu'on ne pensoit, car sadicte Majesté en nulle façon n'ait voulu ouyr parler de Religion disant estre chose qu'elle ne pouvoit ny vouloit au detriment ny seroit pour le bien du Reaulme y changer quelque chose ; mais que si elle estoit recherchée de quelque chose qui toucheroit le bien et repos du Reaulme, elle seroit trouvée tres facile, et ainsi n'en ait on puis apres ouy rien aultre.

? aux confins de ce Reaulme au ? forteresses? et comment on feroit.

Il y ait 15 jours que le Comte d'Aremberg arriva icy envoyé de la part de Don Jehan vers ces Majestez pour faire les complimens, et quattre jours apres y arriva le Comte de Galves, Gendre du Seigneur de Dietericstain, maistre d'hostel de l'empereur, pour se jouir de la Coronation de sa Majesté Imperiale faicte il y ait plus d'un an, et y on attend un aultre de plus grande qualité pour causes de condoleances. Ilz sont tous deux logés au logis du Marquis de Alacan Ambassadeur ordinaire du Roy Catholique en ceste Court, lequel dict se devoir partir bientost d'icy et que son successeur doibt ja estre arrivé à Genoa.

Ledict d'Aremberg doibt en brief passer plus oultre à Vienne et à Gratz pour le mesme effect.

Le prisonnier Gandolfi est encores jusque à ce jourd'huy audict Gratz, s'attendant les saufconduicts et lettres de passage pour Italie.

f64r

Il y ait ia cinq jours que icy est venue nouvelle par corrier expres de Flandre comme le 19 du passe la paix fut publiee a Bruxelles, mais plusieurs ne le croyent, pour ce que on n'ait encores commande aux colonels de surceoir les levees de gens de guerre.

Les deux Ambassadeurs de l'Empereur pour prester l'obeissance au Pape se sont encheminez pour Italie, le seigneur Flac? prieur de l'ordre de sainct Jehan, du lieu de sa residence, qu'est ordinairement a six ou 8 lieues de la de Kaisers Lauttern?, et le Docteur Tomer conseiller Aulique de l'Empereur d'icy.

Il est vray que le Pape ait donne a l'Imperatrix cent mil escus des fruicts de l'Archievesche de Toledo, et pour ce que le Pape entendoit des fruicts a venir, la Majeste de ladicte Imperatrix ait envoye l'homme duquel je vous escrivois par mesdictes dernieres, pour prier sa sainctete qu'ilz soient des fruicts ia escheuz pour les grands besoings que sa Majeste en a presentement.

L'Ambassadeur du Roy de Suetie duquel je vous escrivay par mesdictes dernieres est encores icy, et traictera demain a disner le seigneur Lassky; il ait ia eu lettres de recommandations de ceste Majeste Imperiale au Roy d'Espaigne comme il les desiroit affin de pouvoir avoir ce que je vous escrivay aller chercher a Naples.

L'on m'ait asseure que entre ledict de Suetie et Batory est confederation.

Il y ait quattres jours qu'est icy arrive un serviteur de l'ambassadeur retournant de Constantinoble, duquel on ait entendu que la paix certainement continuera entre sa Majeste Imperiale et le Turc et qu'il n'arme ceste annee, ny moins est certaine la guerre contre le Roy de Perse.

De Prague le 2e mars 77. Post scriptum n'ayant peu envoyer les presentes par le dernier corrier, je vous puis faire certain que me affaire ait este proposee et resolue au conseil aulique, mais n'en ay peu avoir resolution jusque avant qu'en sera faicte relation a l'empereur, qui sera demain; qu'est ce qui est survenu depuis ledict deuxiesme jusque a ce 7e.

f75r

Monseigneur.

Je ne vous ay escrit depuis mes lettres du 18 et 19 d'Apvril pource que nous sommes estes tousjours par chemin, et estant arrivé icy ay faict instance vers l'Empereur pour avoir la Citation puis que le Seigneur Duc de Mantou n'ait respondu, et pensois bien ce jourd'huy avoir resolution en la Requeste que pour ceste cause je presentai le 30e du passé, mais n'ayant esté Conseil ce sera pour le Lundi ou mardi.

Jusque à maintenant je n'ay receu response à tant de lettres escriptes à Messieurs Borsini, de quoy je m'esmerveille grandement luy ayant par divers voyes de la façon que si on me octroyoit la Citation comme je l'ay demandé, je ne saurois exprimer les fructz escheus à ce jour, pource que la somme ait esté laissée en blanc, comme je vous escrivois ja, ny moins ay l'assignation ou mandement faict par Monsieur le Duc de Mantou à ses Ministres de payer tous les ans la somme de 2000 escus, ny la copie de la lettre du mesme Duc aux Presidens et Conseilliers de Montferrat pour ceste cause escripte, ny aucuns instrumens de quittances faictes par vostre procureur avec la procuration du procureur qui ait receu l'argent et a faict lesdictes quittances, lesquels munimens je debvrois neantmoins avoir. Je ne cesseray de luy escrire par toutes les occasions qui me viendront pour une fois avoir quelque lettre de luy. Bien est vray que les Marchans Milanois des Pasques n'ont suivis la Court, mais s'en sont allez à Vienne de façon qu'il pourroit estre qu'ilz auroient quelque lettre ; ilz scavent neantmoins que je suis icy, de maniere que je crains que ledict Seigneur ne soit malade ou mort.

Ayant le Docteur Weber renoncé à son office trois jours devant le parlement de l'Empereur, qui fut le 27e d'Apvril, fut incontinent receu à son lieu le docteur Vichesius? homme de bien, comme j'en ay peu cognoistre pour le temps qu'il est en ceste Court.

Ledict Weber s'en est allé à Auguste pour voir une signorie qu'il ait achepté dernierement en ces quartiers là, appellée Rombals, et retournera à Vienne quand sa Majesté y sera arrivée. Il suivra encores la Court le temps de deux ans pour estre versé aux affaires d'icelle mais plusieurs ne pleureroient s'il n'i [r]etourno[i]t iamais.

Le 2e du present par la voie de Verdun je vous ay escrit de vostredicte affaire le mesme, mais de nouvelles fort amplement, et vous advisay que si on me octroie la Citation, je n'ay argent pour la faire executer. De Wratislavie ledict 2e.

Vostre treshumble et obeissant Serviteur

f76v

aux affaires de la Court mais plusieurs ne [?] pleureroient s'il n'i [?] retournoit iamais. Ceulx qui sont du Conseil secret suyvans la Court sont les deux Archiducques et les Seigneurs Horach et Trautzen. Les electeurs de Saxe et de Brandebourg sont esté à visiter l'Empereur à Budissine où ilz sejournirent trois jours avec grands contentemens comme ilz monstroient, auquel sa Majesté fit grand honneur les appellant en sa presence et à sa table [?]. Peu auparavant le Nonce du Pape fut venu de Prague où il fut defrayé et par tout le pais du Duc de Saxe ; ce luy fut faict par trois hommes qu'on avoit peu sçavoir [?] à un Ambassadeur de Prince estranger ou protestant.

Le 9e de May le Duc de Brigue en Silesie reçeut les Roynes de France son filz avec la fille du Marquis de Anhalt, auxquelles [?] ainsi esté le filz dudict electeur de Brandebourg accompagné de trois cens chevaulx bien en ordre ; et est hier icy arrivée la lettre de l'empereur le 24e dudict passé, ledict filz de Brandebourg [?] ledict d'Anhalt vindrent à Halle, sa Majesté avec lesquels disnerent et sopperent le jour de la Pentecoste, aussi accompagner à la messe et au sermon, mais ne demeurerent à l'une ny à l'aultre, mais se promenerent à l'entour de l'eglise jusque à tant que l'office fut finy.

Il n'y est que le seigneur Roy de Boheme soit esté receu avec tant de pompes que ces icy Empereurs, ayant rencontré environ trois mil chevaulx que l'ay [?] et [?] mil pietons fort bien en ordre ; et fut faicte une porte triumphale fort sumptueuse sur laquelle estoient deux Giants armés tenant chacun d'iceulx une lance à la main avec un pendant et les armes de Boheme et de Silesie, lesquelz faisoient reverence à sa Majesté non plus ny