Méry de Vic to Henri IV, 28 August 1589

Dupuy 61 — Méry de Vic

Méry de Vic — f40r

Sire,

Le premier advis qui feut porté en ceste province du tresmalheureux et inoui assassinat commis en la personne du feu Roy (que Dieu absolve) a esté de la part des Rebelles qui bien advertiz de leur commune sceleratesse commencerent aussi tost à vouloir divertir les fidelles subiectz et vrays françois de leur devoir, à quoy j’adjouste que nous estions ung peu negligents de pourvoir, ne pouvans croire la verité de l’acte commis soubz ung habit de simplicité, joinct que nous nous promecttions, si cella estoit vray, que nous serions honorez des commandemens de vostre Maté, ce qui a esté fort tard n’aiant receu les despesches qu’il vous a pleu m’adresser du ij de ce moys que le xviiie et xx du present. Et puis qu’il a pleu à Dieu appeller vostre Maté à ceste couronne par une droicte et legitime succession et l’establir par des moyens inesperez et avec des acheminemens admirables, n’aiant voulu premierement appeller à soy le deffunct Roy que vostre Maté ne feust recognue des vrais françois protecteur de cest estat, et qu’en ceste qualité elle feust authorisée sur les deux armees jointes et devant la ville cappitalle, affin qu’à la veue d’ung chascun et au principal endroict du Royaume vostre Maté feust honoree et servie des plus grands de leur franche volonté et eust les armes en main pour chastier les opiniastres et rebelles.

J’espere, Sire, qu’en vostre bonheur, accompagné de toute la valeur, bonté, prudence et diligence qui se peuvent desirer en ung grand Monarque, la France recouvrera son ancienne splendeur et authorité, de quoy je supplie le Createur qu’il vous donne bien tost la grace. Les principaux princes et seigneurs de vostre conseil sçavent ce qui occasiona le feu Roy de me commander en ceste province en laquelle j’ay demeuré cinq moys entiers seul aiant charge de tous les affaires concernans son service. Apres avoir faict en ceste ville ce qui estoit le plus necessaire, j’alay au bas Lymosin où je traictay une surseance avec Monsieur de Turenne de quoy vostre Maté feust advertie. Je laisse au jugement des plus clairvoians si, apres avoir asseuré les villes principalles, y avoir couru mille hazards, mesmes avoir veu assassiner en ma presence le feu Chevallier de Baumont?, mon treshumble service a esté utile ou non. Si j’y ay profité quelque chose, à Dieu en soit la louange. Mais

Méry de Vic — f40v

Mais outre les villes particulieres ledit Sr de Turenne en peut rendre à vostre Maté quelque tesmoignage, pour cest effect les Srs d’Andelot, de Maligny?, de la Verrie? et aultres qui y ont passé depuis peu en peuvent donner aussi quelque certitude. Ce que je dis, Sire, pour seulement asseurer vostre Maté que si Dieu m’a conservé jusques icy sans avoir jamais escoutté que les commandemens du Roy deffunct, auquel j’avois cest honneur d’avoir servi dès mes premieres annees, qu’il me donne, s’il luy plaist, la mesme faveur pour ne fleschir jamais devant la rebellion et vous continuer le treshumble, tresfidelle et tresaffectionné service que vous doibt ung bon subiect officier et vray françois, me promecttant aussi que vostre Maté permettra que je serve suivant la declaration qu’elle a faicte pour le regard de la Religion.

L’estat de ceste province n’a esté, Dieu mercy, aultrement alteré depuis ung moys. C’est pourquoy je ne toucheray aucune particularité passée en aiant cy devant rendu conte au feu Roy dont Monsr Revol se peult souvenir. J’adjousteray seulement qu’il y a pres de quatre moys que j’estois espiant l’occasion en ceste ville d’i faire recevoir Monsr le comte de la Voulte ordonné gouverneur en ceste province depuis le moys de fevrier, à quoy plusieurs s’estoient opposez sur divers pretextes qui ont esté enfin vaincuz, et l’avons veu recevoir le mesme jour que furent portees les nouvelles de ce tresmalheureux assassinat. Son arrivée a fortifié les bons, y aiant mené une bonne troupe de gens de guerre commandez soubz luy par Monsr de Montaignac, gentilhomme de grande valeur et fort remarquable pour sa fidelité. On a par ce moyen contenu les Rebelles qui auparavant nous font mille ravages au pauvre peuple jusques aux portes de ceste ville. Il a esté pourveu par ung commun advis à la sureté du païs aiant adverti les villes comme elles avoient à se maintenir et les aiant ralliées dans la fin de ce moys pour se rendre en ce lieu et jurer ensemble une bonne union et se resouldre à ne recevoir aucune nouveauté attendant quelque commandement de vostre Maté. Cependant il a esté advisé d’une chose necessaire de faire le service du feu Roy selon l’ancienne coustume de peur que si on eust differé davantage cella n’eust donné quelque mauvaise odeur à ceulx qui ne se servent que de pretextes et qui pour nous estre maintenus soubz les commandemens de nos superieurs nous qualifient heretiques. Ledict service a esté le plus solennel qu’il nous a esté possible; ung du clergé a faict l’oraison funebre fort à propos selon le

f43r

deuoir.

Les Srs de Pompadour et de Clermont Vertillac tenant le parti contraire ont escrit à messieurs les consuls et habitans de ceste ville leur offrant toute assistance pourveu qu’ilz renoncent la juste obeissance qu’ilz doibvent à vostre Maté. Le Sr duc de Maine leur a pareillement escrit ensemble aux premiers des compagnies et aux particuliers habitans pour les disposer de recevoir ses commandemens. Toutes ses lettres qui sont en nombre de douze sont sur le mesme subject que la copie d’une d’icelles que j’envoie à vostre Maté. Je voy bien que les volontez de plusieurs sont alterées. Si croy je qu’avec l’aide de Dieu tous ces rebelles artifices n’esbranleront aucunement la fidelité de ceste ville ny du voisinage et toutesfois pour entretenir ung chacun en son devoir j’estime qu’il seroit utile qu’il pleust à vostre Maté escrire plusieurs lettres suivant le memoire que j’en envoye desquelles j’espère qu’il sortira du fruict.

? qui avoit tenu le feu Roy en esperance de le servir, s’est déclaré comme plusieurs du ? m’ont asseuré. Il ? amas d’homes et se delibere de faire? un gros ? et autres de cette sorte, qui se devoient? assembler à huict lieues de ceste ville. Leur troupe ? au plus de douze cents hommes? de pied? et deux cents chevaux et doivent meiner deux ou trois pieces. Ilz ont ?. Je ne puis croire qu’ilz s’acheminent ? qui a tousiours parlé en ? servit[e]ur de Roy se change comme on m’a asseuré ? son filz? assemble aussi ? hommes d[e] maisons sont plus à craindre que d[e] persones comme disent ? qui les recognoissent, plusieurs qui soient ennemis de la Ligue? changent, qui prennent ? pretexte? de la religion. Je les? contiens ce que je puis et espere que ? ira ? servira beaucoup. Nous avons escrit ? venir si ? ne l’occupe? ailleurs et que les susdictz s’assemblent?

Si je ne suis plus utile par deçà je supplie tres humblement vostre Maté permettre que je luy aille rendre près sa personne le tres humble service que je luy doibs et cependant me confirmer s’il luy plaist la place que le deffunct Roy m’avoit accordé en son conseil et permission de me deffaire de mon estat sans

Méry de Vic — f43v

faire finance et le conserver aux miens si travaillant pour vostre service et courant mille dangers Dieu faisoit sa volonté de moy / Aiant esté contrainct de faire plusieurs frais extraordinaires comme estant seul qui mect la main a la bource pour ce qui touche vostre service Je me trouve endebté de plusieurs notables sommes mesmes dune partie de deux mille escus pour ung voiage que Je feis au bas Lymosin par commandement du feu Roy ou Je mené Monsr levesque de Lymoges pour lauctoriser davantage y aiant depuis establi garnison comme Il estoit necessaire Jay depuis deux moys reduict deux forts en vostre obeissance tout a mes despens : de lung desquels Mr de Halaguin? est tesmoing lautre a esté demol[i] a quoy Jay faict de grands frais et supplie treshumblement vostre Maté y avoir esgard et ordonner que Je puisse me rembourser de la somme de six cens escus sur les quinze mille escus que le feu Roy avoit accordé que nous prissions sur ses tailles et cependant me donner ung petit estat de la valeur de troys cens escus vacquant Il y a long temps comme estant de nulle valeur de quoy Jenvoye le placet a Mr Revol offrant plustost le prendre en deduction de ce qui me peult estre deu pour mon entretenement / Ce peu me donnera moyen de continuer laffection que Jay de servir fidellement / Si vostre Maté a agreable que Je me retire Il est necessaire dy envoier quelquung qui avec douceur et ung peu de creance puisse reduire toutes choses car la force y seroit Inutile. Il se fauldra aussi trouver pour lelection des consuls Je my trouvay lan passé et croy que le bon choix qui feut faict est cause en partie de la conservation de ceste ville Jay faict le semblable pour toutes les aultres villes ou le temps est escheu. du reste / Nous desirons aussi scavoir sil plaist a vostre Maté que Je continue la commission de la vente et saisie des biens des Liguez avec les tresoriers de ceste generalité que Je proposay de les associer et dautant que la pluspart diceulx sont esloignez ou chassez pour estre de la Ligue sil vous plaist que

ou Jay tousjours entretenu garnison a mes despens aussi lautre qui est dimportance

Méry de Vic — f44r

Jaie loeil sur ce qui se passe en leur charge et my rende subiect aux occasions dimportance. Javois aussi plusieurs aultres commissions particulieres desquelles si vostre Maté me Juge propre pour y servir Il seroit soubz vostre bon plaisir besoing den avoir une confirmation Jay cy devant supplié pareillement vostre Maté commander que les levees des tailles qui se font sur le Lymosin par les garnisons du Bourgnou? et Argenton cessassent cella ne devoit point estre par lassurance que Javois arrestée avec Monsieur de turenne Il y a auiourdhuy moins dassurance affin que tout vienne en voz receptes generalles sur lesquelles lesdictes garnisons seront paiées seulement quil vous en plaira ordonner autrement vostre pauvre peuple sera ruiné sans aucun fruict car chascun le despouille de ce quil peult sans que cella tienne lieu dune? Il seroit necessaire / Javois cy devant charge du feu Roy de visiter les despesches dItalie en Espaigne dans lesquelles Jay tousjours trouvé mille mauvais desseins contre la france et les Intelligences des Ennemys Jen ay visité une depuis deux Jours qui estoit la charge de troys semaines dans laquelle Jay trouvé ung monde de meschants esprits contre la memoire du deffunct Roy et contre vostre Maté avec tant de mensonges et calomnies que Jen ay horreur Jay tout retenu et dechire pour la pluspart du principal qui Importe Jen dresse des extraicts pour vous les faire veoir quand Il plaira a vostre Maté laquelle Je supplie me commander si Je les visiteray desormais ou non / Je ne touche aucunement aux affaires des particuliers mais seulement a ce qui Importe vostre service Je ne voy point aussi celles quon porte deSpaigne a cause du passeport de Monsieur le Mareschal / Jay persuadé a Messrs de ceste ville de faire fondre ung canon ou deux pour Intimider les rebelles qui ont des forts Icy es environs lesquels ne peuvent estre forcez sans cella on my travaillera toutesfois sans commandement

Méry de Vic — f44v

de vostre Maté. Si le Sr de La Coste qui en a deux qui luy appartiennent nous les eust voulu prester, je m’asseure que la rebellion manifeste seroit hors de ce païs. Attendant les commandemens dont il vous plaira m’honorer, je vous jure, Sire, la mesme fidelité et tres humble affection à vostre service que j’ay tousjours portée au feu Roy, sur l’asseurance de vostre protection et n’espargner vie ny autre chose que je puisse pour en rendre les preuves que je dois. En ceste volonté je supplie le Createur vous donner,

Sire, accroissement de santé et de toute sorte de bonheur pour à son honneur et gloire restablir cest estat en son ancienne splendeur et au bien et soulagement de voz peuples, vaincre et ruiner tous voz ennemys et les leurs, selon le souhait de

Vostre tres humble, tres obeissant et tres obligé serviteur et subject, M. de Vic. De vostre ville de Lymoges ce XXVIIIe Aoust 1589.