Louis XIII to Philippe de Béthune, 30 June 1629

Français 3675

f53r

Monsr de Bethune, Sur l'advis que vous m'avez cy devant donné des grandes instances que l'ambassadeur d'Espaigne faisoit par deça pour obtenir en faveur du Roy son mre une place à la première promotion des Cardinaux qui se doibt faire, Comme je suis asseuré que sa Saincteté sera assez disposée à me donner le mesme contentement pour les raisons que chacun sçayt et que les choses que j'ay faictes à la Rochelle en Italie et depuis en cette province de Languedoc pour la Religion Catholique peuvent estre en assez forte consideration par de là pour en esperer une faveur toute particulière, J'ay resolu de proposer à sa saincteté un subject qui par soy mesme merite cette dignité. C'est le sieur archevesque de Lyon que je vous ordonne de nommer à sa Saincteté en faveur duquel vous aurez à luy demander en mon nom le bonnet de Cardinal. Vous sçavez quelle est sa naissance et combien à cela s'est rendu recommandable par sa vertu, suffisance et pieté et par les autres bonnes qualitez qui sont en sa personne. Je desire que vous les fassiez valloir et peser à sa Saincteté y adjoustant de plus la recommandation des grands services de mon cousin le cardinal de Richelieu son frere de qui le [passage rayé] la conduicte et les actions sont telles et ont porté de si grand[s] a[d]uantages à l’eglise ? pu[b]lic et à cet [esta]t qu’il a ambition d’estre recongneu[?] [non] seullement en ma personne [ma]is encor[e]s de ceu[x] qui ? touchent. Vous aurez donc à vous employer en cette affaire tant vers sa Saincteté que mon cousin le Cardinal

f53v

Barberin, ausquelz [?] les l[ett]res cy joinctes comme en chose que j’affectionne autant que de bonne part [?] de faire leurs offices et instances necessaires en mon nom pour en obtenir un prompt effect à mon contentement. Voulant que vous accompagniez cette demande de toutes les raisons que verrez estre convenables, et que mesmes vous representiez qu’il y a plus [de] douze Card[ina]ux à la nomination d’Espaigne, qu’il n’y en a que quatre françois et qu’il importe à sa S[aincte]té qu’il y en aye plusieurs, affin qu’au moings il y en aye deux qui resident ordinairement à Rome, lesquelz soient attachez à sa devotion et du Card[ina]l Barberin, comme [?] propose continuer. Sur ce je prie Dieu, Monsr de Bethune, qu’il vous ayt en sa s[ainc]te et digne garde. Escrit au camp de St Chatte le dernier j[our] de juing 1629.

Louis

Bouthillier